ధరలు తగ్గడంతో.. భారీగా తగ్గిన ఇంటి భోజనం ఖర్చు

దేశంలో నిత్యావసరాల ధరలు సామాన్యుడికి కొంత ఊరట కల్పించాయి. ఇంట్లో వండుకునే శాకాహార, మాంసాహార భోజనం (థాలీ) ఖర్చు గతేడాదితో పోలిస్తే ఆగస్టు నెలలో గణనీయంగా తగ్గింది. వెజ్ థాలీ ధర 7 శాతం తగ్గగా, నాన్-వెజ్ థాలీ ధర 8 శాతం వరకు దిగొచ్చినట్లు ప్రముఖ రేటింగ్ ఏజెన్సీ క్రిసిల్ ఇంటెలిజెన్స్ తన నివేదికలో సోమవారం వెల్లడించింది.

ప్రధానంగా ఉల్లిపాయలు, బంగాళాదుంపలు, పప్పుల ధరలు భారీగా తగ్గడమే శాకాహార భోజనం ధర తగ్గడానికి కారణమని నివేదిక స్పష్టం చేసింది. గత ఏడాదితో పోలిస్తే ఉల్లి ధర 37 శాతం, బంగాళాదుంప ధర 31 శాతం మేర క్షీణించాయి. గతేడాది దిగుబడి తగ్గడంతో ఈ రెండింటి ధరలు ఆకాశాన్నంటాయి. అయితే, ఈసారి ఉల్లి ఉత్పత్తి 18-20 శాతం, బంగాళాదుంప ఉత్పత్తి 3-5 శాతం పెరగడంతో ధరలు అదుపులోకి వచ్చాయి. అదేవిధంగా, అధిక ఉత్పత్తి, మెరుగైన నిల్వల కారణంగా పప్పుల ధరలు కూడా 14 శాతం తగ్గాయి.

"గతేడాది అధిక ధరలు ఉండటం వల్ల ఈసారి ఉల్లి, బంగాళాదుంపల ధరలు బాగా తగ్గినట్లు కనిపించింది. పెరిగిన ఉత్పత్తితో పప్పుల ధరలు కూడా అదుపులోకి వచ్చాయి. అయితే, టమాటా, వంట నూనెల ధరలు పెరగడంతో థాలీ ఖర్చు మరింత తగ్గలేదు" అని క్రిసిల్ ఇంటెలిజెన్స్ డైరెక్టర్ పుషన్ శర్మ తెలిపారు. ప్రభుత్వం బఠాణీ, మినపప్పుల దిగుమతికి అనుమతించడం వల్ల రానున్న రోజుల్లో పప్పుల ధరలు మరింత తగ్గే అవకాశం ఉందని ఆయన అభిప్రాయపడ్డారు.

మరోవైపు, మాంసాహార థాలీ ధర తగ్గడానికి బ్రాయిలర్ కోడి మాంసం ధరలు 10 శాతం తగ్గడమే ప్రధాన కారణం. నాన్-వెజ్ థాలీ ఖర్చులో దాదాపు 50 శాతం చికెన్ దే ఉంటుంది. దీనికి తోడు కూరగాయలు, పప్పుల ధరలు తగ్గడం కూడా కలిసొచ్చింది. దేశంలోని ఉత్తర, దక్షిణ, తూర్పు, పశ్చిమ ప్రాంతాల్లోని ధరల ఆధారంగా ఇంట్లో భోజనం తయారు చేయడానికి అయ్యే సగటు ఖర్చును లెక్కించి క్రిసిల్ ఈ నివేదికను రూపొందించింది.